Prologue de l'auteur

Song of Artist François Rabelais. Check Here the full Lyric of Prologue de l'auteur, a Song of François Rabelais. Do you want to see more lyrics of François Rabelais, check the category page with letter F or visit the artist page with all lyrics of François Rabelais!

Check all Lyrics of François Rabelais:
  • Homepage
  • >
  • F
  • >
  • François Rabelais – Prologue de l’auteur

François Rabelais – Prologue de l’auteur

Beuveurs tresillustres & vous Verolez tresprecieux (car à vous non à aultres sont dediez mes escriptz) Alcibiades en un dialoge de Platon, intitulé Le banquet, louant son precepteur Socrates sans controverse prince des philosophes: entre aultres paroles le dict estre semblable es Silènes.  Silènes estoyent iadis petites boites telles que voyons de present es bouticqs des apothecaires, pinctes au dessus de figures ioyeuses et frivoles, comme de Harpies, Satyres, oysons bridez, lievres cornuz, canes bastées, boucqs volans, cerfz limonniers, & aultres telles pinctures contrefaictes à plaisir pour exciter le monde à rire.  Quel fut Silène maistre du bon Bacchus.  Mais au dedans l’on reservoit les fines drogues, comme Baulme, Ambre gris, Amomon, Musc, zivette, pierreries, et aultres choses precieuses.  Tel disoit estre Socrates: parce que le voyans au dehors, & l’estimans par l’exteriore apparence, n’en eussiez donné un coupeau d’oignon: tant laid il estoit de corps & ridicule en son maintien, le nez pointu, le reguard d’un taureau: le visaige d’un fol: simple en meurs, rusticq en vestemens, pauvre de fortune, infortuné en femmes, inepte à tous offices de la republicque: tousiours riant, tousiours beuvant à un chascun, tousiours se guabelant, tousiours dissimulant son divin sçavoir.  Mais ouvrans ceste boite, eussiez au dedans trouvé une celeste & impreciable drogue: entendement plus que humain, vertu merveilleuse, couraige invincible, sobresse non pareille, contentement certain, asseurance parfaicte, desprivement incroyable de tout ce pourquoy les humains tant veiglent, courent, travaillent, navigent & bataillent. ***  A quel propos, en vostre advis, tend ce prelude, & coup d’essay? Par autant que vous mes bons disciples, & quelques aultres folz de seiour lisans les ioyeux tiltres d’aulcuns livres de nostre invention, comme Gargantua, Pantagruel, Fessepinthe, La dignité des Braguettes, Des Poys au lard cum commento etc, iugez trop facilement ne estre au dedans traicté que mocqueries, folateries, & menteries ioyeuses: veu que l’enseigne exteriore (c’est le tiltre) sans plus avant enquerir, est communément repceu à derision & gaudisserie.  Mais par telle legiereté ne convient estimer les oeuvres des humains.  Car vo’ mesmes dictes, que l’habit ne faict point le moine: & tel est vestu d’habit monachal, qui au dedans n’est rien moins que moyne: & tel vestu de cappe hispanole, qui en son couraige nullement affiert à Hispane.  C’est pourquoy fault ouvrir le livre: et soigneusement peser ce qui y est deduict.  Lors congnoistrez que la drogue dedans contenue est bien d’aultre valeur, que ne promettoit la boitte.  C’est à dire que les matieres icy traictées ne sont tant folastres, comme le tiltre au dessus pretendoit.  Et posé le cas, qu’au sens literal trouvez matières assez ioyeuses & bien correspondentes au nom, toutesfois pas demourer là ne fault, comme au chant des Sirènes: ains à plus hault sens interpreter ce que par adventure cuidiez dict en guaieté de cueur. ***  Crochetastes vo’ oncques bouteilles? Caisgne.  Redvisez à memoire la contenence qu’aviez.  Mais veistez vo’ oncques chien rencontrant quelque os medullare?  C’est comme dict Platon li. 2 de rep. la beste du monde plus philosophe.  Si veu l’avez: vo’ avez peu noter de quelle devotion il le guette: de quel soing il le guarde: de quel ferveur il le tient: de quelle prudence il l’entomne: de quelle affection il le brise: et de quelle diligence il le sugce.  Qui l’induict à ce faire? Quel est l’espoir de son estude? quel bien y pretend il? Rien plus qu’un peu de mouelle.  Vray est que ce peu, plus est delicieux que le beaucoup de toutes aultres pour ce que la mouelle est aliment elabouré à perfection de nature, comme dict Galen iij facu. natural. & xj de usu particu.  A l’exemple d’icelluy vo’ convient estre saiges pour fleurer sentir & estimer ces beaux livres de haulte gresse, legiers au prochaz: & hardiz à la rencontre.  Puis pour curieuse leczon, & meditation frequente rompre l’os, & sugcer la substantificque mouelle… 

Copyright © lyrics.ph - All rights reserved.